MSSD, Pinangunahan ang Pagsasanay para sa mas Matibay na Proteksyon ng mga Bata sa Basilan, Sulu, at Tawi-Tawi
COTABATO CITY (Ika-10 ng Marso, 2025) — Pinangunahan ng Ministry of Social Services and Development (MSSD), kasama ang Council for the Welfare of Children (CWC) at ang Bangsamoro Regional Sub-Committee for the Welfare of Children (RSCWC-BARMM), ang tatlong-araw na pagsasanay mula ika-24 hanggang ika-26 ng Pebrero sa Zamboanga City.
Layunin ng programa na palakasin ang kakayahan ng Local Councils for the Protection of Children (LCPCs) sa Basilan, Sulu, at Tawi-Tawi sa pagpapatupad ng mga polisiya at programang pang proteksyon sa mga bata sa kanilang mga komunidad.
Sa pagsasanay, tinuruan ang mga kalahok ng mahahalagang kaalaman at kasanayan upang maisakatuparan ang tinatawag na “Four Legacies for Children”, na nagsisilbing gabay sa pagsusulong ng karapatan at kapakanan ng mga bata sa lokal na antas: Local Development Plan for Children (LDPC), Local Investment Plan for Children (LIPC), Local Code for Children (LCC),
Local State of Children’s Report (LSCR).
Ang mga ito ay mahalagang bahagi ng Child-Friendly Local Governance Audit (CFLGA), isang sistema na sumusuri kung epektibong naipapatupad ang mga programa para sa kapakanan ng mga bata sa mga lokal na pamahalaan.
Sa pamamagitan ng pagsasanay na ito, pinagtitibay ng MSSD ang kanilang pangako na palakasin ang mga lokal na istruktura ng pangangalaga sa bata, isulong ang inklusibong pamamahala, at tiyakin na ang kapakanan ng mga bata ay pangunahing isinasaalang-alang sa pagbuo ng mga polisiya sa buong rehiyon ng Bangsamoro. (Hasna U. Bacol, BMN/BangsamoroToday)
