200 estudyante sa Guindulungan, naging ‘Kiddie Waste Warriors’ ng PGSO
GUINDULUNGAN, MAGUINDANAO DEL SUR (Ika-24 ng Hunyo, 2026) — Upang itanim ang kahalagahan ng pangangalaga sa kapaligiran sa murang edad, mahigit 200 mag-aaral ng Tambunan Central Elementary School sa bayang ito ang sumailalim sa “WAIS-BASURA!” program at “HEARTBIN Project” nitong nakalipas na mga araw.
Ang naturang aktibidad ay pinangunahan ng Provincial General Service Office (PGSO) ng Pamahalaang Panlalawigan ng Maguindanao del Sur, bilang bahagi ng kanilang malawakang kampanya sa tamang pamamahala ng basura o solid waste management sa mga paaralan.
Sa pamamagitan ng programa, masayang tinuruan ang mga estudyante ukol sa tamang pagbubukod-bukod ng mga basura tulad ng nabubulok (biodegradable) at muling magagamit (recyclable).
Upang masanay ang mga kabataan sa aktwal na aplikasyon nito, pinagkalooban din ng PGSO ang paaralan ng mga bagong nakukulayong “HEARTBINS” o mga basurahan para sa tamang segregasyon.
Kasabay nito, isinagawa rin ang isang Information and Education Campaign (IEC) session kung saan ginabayan ang mga tinaguriang “Kiddie Waste Warriors” sa tamang paggamit ng mga basurahan at pinalalim ang kanilang tungkulin sa pagpapanatili ng kalinisan sa kanilang komunidad.
Ang inisyatibong ito ay nakatutok sa “GIVE HEART” program ng lalawigan na naglalayong isulong ang disiplina, kalinisan, at aktibong pakikilahok ng mamamayan—mula sa mga bata hanggang sa mga nakatatanda—tungo sa isang matatag at progresibong probinsya. (BMN/ BangsamoroToday.com)
