MAFAR Nagbigay ng 50 na Baka sa MILF Combatants’ Cooperative sa Tawi-Tawi
COTABATO CITY (Ika-7 ng Marso, 2025) — Pormal na ipinagkaloob ng Ministry of Agriculture, Fisheries, and Agrarian Reform (MAFAR) ang 50 na baka at isang pabahay para sa mga ito sa Lato-Lato Farmers and Fisherfolk Association, isang kooperatiba ng MILF combatants sa Barangay Paniongan, Bongao, noong ika-22 ng Pebrero.
Pinangunahan ni MAFAR-SDF Program Officer Engr. Najib Usman ang turnover ceremony, kung saan binigyang-diin niya ang pangako ng ahensya na patuloy na susuporta sa mga lokal na kooperatiba at palalakasin ang sektor ng agrikultura sa Bangsamoro Autonomous Region in Muslim Mindanao (BARMM). Ang tulong ay mula sa Special Development Fund (SDF) ng MAFAR.
Lubos namang nagpapasalamat ang mga benepisyaryo sa Bangsamoro Government sa pangunguna ni Chief Minister Ahod “Al Haj Murad” B. Ebrahim at MAFAR sa ilalim ng pamumuno ni Minister Mohammad S. Yacob, Ph.D., sa kanilang walang sawang suporta sa mga pamayanan.
Ayon kay Mobin Sali, kinatawan ng kooperatiba, malaking tulong ito sa kanilang kabuhayan, “This is a great help for our association members. We promise to take good care of these cattle and strive to double their number—from 50 heads to 100 or even more.”
Plano ng grupo na paramihin ang mga baka upang gawing isang pangmatagalang negosyo. Malaking tulong ito sa mga miyembro ng kooperatiba dahil magkakaroon sila ng pangmatagalang pagkakakitaan sa pamamagitan ng pagbebenta ng karne at gatas.
Bukod sa dagdag na kita, makakatulong din ito upang mapunan ang pangangailangan sa karne at gatas sa rehiyon, na magpapabuti sa seguridad sa pagkain. (Hasna U. Bacol, BMN/BangsamoroToday)
