MOH-BARMM at Pfizer, Nagkaisa sa Kasunduan at 30,000 Meal Packages para sa mga Bangsamoro
COTABATO CITY (Ika-10 ng Pebrero, 2025) — Lumagda sa isang kasunduan ang Ministry of Health ng Bangsamoro Autonomous Region in Muslim Mindanao (MOH-BARMM) at Pfizer sa isang seremonya na ginanap sa Operation Hall, MOH Office, Bangsamoro Government Center, Cotabato City noong ika-7 ng Pebrero.
Bilang bahagi ng kasunduang ito, tinanggap ng MOH-BARMM ang 30,000 meal packages mula sa Rise Against Hunger, na personal na iniabot nina Shamie Zainal, Director of Global Policy and Public Affairs, at Odette Soriano, Market Access Lead ng Pfizer.
Tiniyak ni Health Minister Kadil M. Sinolinding, Jr., MD, DPBO na agad ipapamahagi ang 30,000 meal packages sa 40 munisipalidad sa rehiyon. “We can see from this collaborative agreement that promoting healthier Bangsamoro together becomes very meaningful, and we say, ‘Sa Bangsamoro, Bawat Buhay Mahalaga,” pahayag pa ni Doc. Sinolinding.
Dagdag pa niya, buo ang suporta ng MOH-BARMM sa proyekto, “Let our children grow at an optimum level and let them feel that they are taken care of, not only by the parents but also by the government that they are looking up to.”
Samantala, binigyang-diin ni Assistant Secretary of Health Abdulhalik M. Kasim, MD, CESE II, na ito ang kauna-unahang pakikipagtulungan ng isang international private entity sa isang regional office sa BARMM. Aniya, “This collaboration is one of the directions of the MOH-BARMM to have more logistics and services all throughout the region. This partnership is not just a national or a country, but a first private entity collaboration.”
Pinatunayan ng kasunduang ito ang pangako ng MOH-BARMM sa pagpapalakas ng ugnayan sa mga pandaigdigang pribadong organisasyon, na maaaring humantong sa mas maraming proyekto at inisyatiba para sa kapakanan at kalusugan ng mga Bangsamoro. (Hasna U. Bacol, BMN/BangsamoroToday)
