Payout Para sa 162 Benepisyaryo ng BSK, ABaKA, at Kupkop Program, Isinasagawa ng MSSD at Opisina ni MP Anayatin
COTABATO CITY (Ika-15 ng Nobyembre, 2024)— Isinasagawa ng Ministry of Social Services and Development (MSSD), sa pakikipagtulungan ng opisina ni MP Dr. Susana Anayatin, ang payout para sa 162 benepisyaryo ng Bangsamoro Sagip Kabuhayan (BSK), Angat Bangsamoro: Kabataan Tungo sa Karunungan (ABaKA), at Kupkop Program ngayon araw ika-15 ng Nobyembre sa Pedro Colina Hill, RH 1, Cotabato City.
Ayon kay Rafsanjani Anam, Planning Officer IV ng MSSD, ang layunin ng programang ito ay hindi lamang matugunan ang agarang pangangailangan ng mga benepisyaryo, kundi upang palakasin din ang kanilang pangkalahatang kalusugan at kahandaan sa hinaharap. Binibigyang-diin ni Anam ang kahalagahan ng pagkakaroon ng mga programang makatutulong sa pagpapabuti ng buhay ng mga mamamayan, lalo na sa mga pinakamahihirap na sektor ng lipunan.
Ang mga benepisyaryo ng tatlong programa ay nakatakdang makatanggap ng mga ayuda upang masuportahan ang kanilang mga kabuhayan at edukasyon, na magsisilbing hakbang patungo sa isang mas maginhawa at mas matagumpay na buhay.
Ang programang ito ay pinondohan mula sa Transitional Development Impact Fund (TDIF) na ipinagkaloob ng opisina ni MP Anayatin sa MSSD, na layong magbigay suporta sa mga mahihirap at vulnerable na sektor sa rehiyon ng Bangsamoro. (Hasna U. Bacol, BMN BangsamoroToday)
