Al Haj Murad Ebrahim, Mainit na Sinalubong ang Pagbisita ni Commander Bravo sa Camp Darapanan
COTABATO CITY (Ika-9 ng Setyembre, 2025) — Mainit na sinalubong ni Moro Islamic Liberation Front (MILF) Central Committee Chairman at United Bangsamoro Justice Party (UBJP) President, Al Haj Murad Ebrahim, si Abdullah “Commander Bravo” Macapaar—MILF North Western Command Commander at miyembro ng Bangsamoro Transition Authority (BTA)—sa Camp Darapanan, Simuay, Sultan Kudarat, Maguindanao del Norte noong Lunes, Setyembre 8.
Sa kanilang makasaysayang pagkikita, kapwa binigyang-diin nina Chairman Murad at Commander Bravo ang kahalagahan ng patuloy na pagsunod ng bawat Bangsamoro sa mga prinsipyo ng MILF, gayundin sa tapat na pagyakap sa mga aral ng Qur’an at Sunnah.
Ayon sa kanila, ang tunay na tagumpay, dignidad, kasaganaan, at ang karapatang magpasya para sa sariling kapalaran ay makakamit lamang sa pamamagitan ng matatag at makatarungang pamumuno ng MILF.
Muling iginiit ni Chairman Murad na ang laban ng Bangsamoro ay hindi pa ganap na nagtatapos. Bagkus, ito ngayon ay nagbago ng anyo—mula sa armadong pakikibaka tungo sa mapayapang pamamaraan ng pagkakaisa, pagtitiyaga, at matatag na paninindigan para sa moral na pamamahala. (Noron M. Rajabuyan, BMN/BangsamoroToday)
