Gob. Midtimbang, Pinangunahan ang Pag-aayos ng Malaking Rido sa Maguindanao del Sur
COTABATO CITY (Ika-18 ng Agosto, 2025) — Pinangunahan ni Gobernador Datu Ali “Datu sa Talayan” Midtimbang ang matagumpay na pag-aayos ng matagal nang rido (alitang-pamilya) sa pagitan ng grupo ni Commander Zainudin Kiaro at Commander Kagi Gani Adam.
Isinagawa ang pormal na kasunduan sa bayan ng Datu Anggal Midtimbang, na inaasahang magbibigay-daan sa ligtas na pagbabalik ng libu-libong residenteng lumikas mula sa anim na barangay dahil sa mga nagdaang sigalot.
Binigyang-diin ni Gob. Midtimbang na ang pagkakasundo ay nananatiling sentro ng kanyang adbokasiya.
Ang kasunduan ay bunga ng patuloy na pakikipag-ugnayan at mediasyon ng Pamahalaang Panlalawigan katuwang ang Philippine National Police sa pangunguna ni RD BGen Jaysen de Guzman, ang Armed Forces of the Philippines sa pamumuno ni BGen Edgar Catu, at ang Moro Islamic Liberation Front (MILF) na kinatawan nina Ustadz Abdul Wahid Tundok ng 118th Base Command at Ustadz Yasser Abdulkadir ng 128th Base Command.
Dumalo rin sa makasaysayang pag-aayos sina Mayor Datu Nathaniel Midtimbang ng DAM, Board Member Datu Yasser Ampatuan, at MILF-CCCH Chairman at Bangsamoro Parliament Member Butch Malang, na nagpapatunay ng malawak na suporta para sa pangmatagalang kapayapaan sa rehiyon.
Sa ilalim ng kasunduan, ang magkabilang panig ay nangakong susunod sa mga patakaran ng pananagutan, kabilang ang pagharap sa legal na proseso at agarang pagtiwalag sa hanay ng MILF sakaling may lumabag. Nangako rin ang magkabilang panig na tutulong sa ligtas na pagbabalik at pagbibigay-proteksyon sa mga sibilyan mula sa mga barangay ng Libutan, Liyab, Bagumbong, Daladap, Linantangan, at Pinbalkan—mga komunidad na matinding naapektuhan ng kaguluhan. (Tu Alid Alfonso, BMN/BangsamoroToday)
