SUBATRA Program Katuwang sa Pagpapalakas ng mga Katutubo sa BARMM
COTABATO CITY (Ika-16 ng Nobyembre, 2024) — Ang Ministry of Indigenous Peoples’ Affairs sa pamamagitan ng Special Public Assistance and Legal Aid Division (SPALAD), at sa pakikipagtulungan ng Suporta sa Bangsamoro Transition (SUBATRA), ay matagumpay na nagsagawa ng tatlong araw na pagsasanay na may temang “Empowering Indigenous People as Peacekeeping Force and Responder” mula ika-12 hanggang ika-14 ng Nobyembre sa Pagana.
Sa unang araw ng aktibidad, natutunan ng mga kalahok ang mga mekanismo sa tradisyonal at mainstream na proseso ng paglutas ng mga sigalot.
Sa ikalawang araw, tinalakay ang konsepto ng pag-aresto at ang tamang pamamaraan ng pag-aresto ng mamamayan. Kasama rin ang pagbabawal sa pag-aasawa ng menor de edad ayon sa RA 11596, ang mga karapatan ng mga katutubo sa ilalim ng RA 11054 (BOL), ang apat na Karapatan ng mga Katutubo ayon sa RA 8371 (IPRA), ang Chainsaw Act of 2002, at ang Revised Forestry Code.
Sa ikatlong araw naman, pinagtuunan ng pansin ang disaster at risk management, pati na rin ang pagsasanay sa first aid at basic life support na may kasamang mga praktikal na pagsasanay.
Ayon sa MIPA, ang pagsasanay ay dinisenyo upang bigyan ng kapangyarihan ang mga Katutubo bilang Puwersa ng Kapayapaan at Responder sa pamamagitan ng pagbibigay ng kaalaman at kasanayang kinakailangan para mapanatili at mapalakas ang kapayapaan at kaayusan sa kanilang lupang ninuno, gayundin ang pagtiyak sa kaligtasan ng bawat miyembro ng kanilang komunidad, lalo na sa mga oras ng emerhensiya. (Hasna U. Bacol, BMN/BangsamoroToday)
