LBO, Mariing Kinundena ang sinasabing “Illegal Raid” ng Militar sa Tanggapan ng MBHTE sa BARMM

COTABATO CITY (Ika-17 ng Setyembre, 2025) – Mariing kinondena ng League of Bangsamoro Organizations (LBO) ang umano’y iligal at kapuna-punang pagsalakay noong Setyembre 5, 2025, ng pinagsamang puwersa ng Philippine Army, Marines, at Cotabato City Police sa opisina ng Ministry of Basic, Higher, and Technical Education (MBHTE) na matatagpuan sa loob mismo ng Bangsamoro Government Center.

Ayon sa opisyal na pahayag ng LBO, walang pahintulot, koordinasyon, o malinaw na legal na basehan ang ginawang pagkuha ng mga dokumento mula sa pangangalaga ng Resident Auditor ng Commission on Audit (COA). Ang nasabing operasyon ay isinagawa nang walang sinamahan mula sa COA, walang orihinal na memorandum o mission order, at tanging photocopy lamang ng dokumento ang ipinakita bilang awtoridad — isang malinaw na paglabag sa umiiral na audit protocols at prinsipyo ng civilian supremacy.

“Hindi ito basta-bastang operasyon — ito ay malinaw na pananakot at panggigipit,” ayon sa LBO

Tinawag ng LBO ang insidente bilang “nakababahala, hindi kinakailangan, at isang malinaw na pag-atake sa prosesong pangkapayapaan”. Ayon pa sa grupo, hindi ito isang simpleng administrative na usapin kundi isang politically motivated na hakbang upang siraan si Minister Mohagher Iqbal, na matagal nang kinikilala bilang isa sa mga haligi ng kapayapaan sa Mindanao.

“Malinaw na layunin ng kilos na ito ang sirain ang reputasyon ni Minister Iqbal, pahinain ang kanyang liderato, at guluhin ang pinaghirapang Bangsamoro peace process,” pahayag ng LBO.

Idinagdag pa ng grupo na si Minister Iqbal mismo ay bukas at aktibong humihiling ng isang audit, bilang suporta sa transparency at pananagutan. Bilang isang dating peace negotiator, hindi kailanman umiiwas sa pananagutan si Iqbal at nananawagan pa nga na mapabilis ang proseso upang malinis ang pangalan niya at ng kanyang ministeryo.

LBO: “Pag-atake sa MBHTE, atake sa buong Bangsamoro peace process”

Hindi lamang daw si Minister Iqbal o ang MBHTE ang tinamaan ng operasyon — kundi ang mismong espiritu ng kapayapaan at pagkakabuo ng BARMM. Ayon sa LBO, ang insidente ay isang garapalang paglabag sa asymmetrical relationship ng National Government at ng Bangsamoro Autonomous Region, at maaaring maging mitsa ng unti-unting pagguho ng tiwala na binuo sa loob ng 17 taong negosasyon.

Kasabay nito, kinondena rin ng LBO ang pahayag ni Atty. Rasul Mitmug, Chairman ng Blue-Ribbon Committee ng Bangsamoro Parliament, na nananawagan kay Iqbal na mag-leave muna sa puwesto habang iniimbestigahan. Ayon sa grupo, ang naturang panawagan ay walang basehan, prejudicial, at bahagi umano ng isang mas malawak na “demolition job” upang agawan ng puwesto si Iqbal bago ang halalan sa Oktubre.

“Ang audit ay laban sa institusyon, hindi laban kay Minister Iqbal bilang tao. Walang sinuman ang dapat husgahan nang wala pang legal na pasya,” giit ng LBO.

LBO nanawagan kay Pangulong Marcos na kumilos agad

Nanawagan din ang LBO kay Pangulong Ferdinand Marcos Jr. na agarang kumilos at pigilan ang ganitong uri ng militarisasyon at pulitikal na panggigipit sa mga institusyon ng BARMM. Ayon sa grupo, ang pagpapatuloy ng ganitong gawain ay magbubura sa mga pinaghirapang tagumpay ng kapayapaan at maaaring magdulot ng panibagong sigalot sa rehiyon.

“Ang kapayapaan na meron tayo ngayon ay napakahalaga. Hindi ito dapat wasakin ng mga pulitikang makasarili at operasyong hindi sumusunod sa batas,” pagtatapos ng LBO. (BMN/BangsamoroToday)