246 Trainees, Matagumpay na Nagtapos sa Language Training Program ng MBHTE-TESD
COTABATO CITY (Ika-6 ng Oktubre, 2025) — Matapos ang isang buwang pagsasanay na sinimulan noong unang linggo ng Setyembre, matagumpay na nagtapos ang 246 trainees sa language training programs ng Ministry of Basic, Higher, and Technical Education – Technical Education and Skills Development (MBHTE–TESD) sa ilalim ng Regional Language Skills Institute – Zamboanga City Liaison Office (RLSI–ZCLO). Pinasinayaan ang pagtatapos sa Pinagsamang Virtual at Face-to-Face Graduation Ceremony noong Oktubre 3, 2025.
Layunin ng programa na hindi lamang magturo ng iba’t ibang wika, kundi palawakin ang pag-unawa sa iba’t ibang kultura, patatagin ang interkultural na komunikasyon, at isulong ang pagkakaisa sa kabila ng pagkakaiba ng komunidad.
Sampung (10) batch ng trainees ang lumahok sa virtual ceremony, habang tatlong (3) batch naman ang dumalo sa face-to-face graduation na ginanap sa RLSI Laboratory Room. Idinaos din ang pagtatapos ng Community Based Training (CBT) Arabic Language A1 trainees sa Yati Drive, Talon-talon, Zamboanga City.
Narito ang bilang ng mga nagsipagtapos:
– Spanish Language A1 (Batch 3) – 24 graduates
– Bahasa Melayu A1 Level (Batches 5 & 6) – 49 graduates
– English Language A2 (Batches 6–9) – 98 graduates
– Arabic Language A1 (Batches 4–9) – 75 graduates
Pinangunahan ni Mr. Aramar B. Bayani, Vocational Instruction Supervisor, ang seremonya kasama ang mga language trainers at opisyal ng RLSI–ZCLO, bilang pagkilala sa sipag at determinasyon ng mga trainees na matagumpay na nakapagtapos ng kanilang pagsasanay.
Ang tagumpay ng graduation na ito ay nagpapatunay ng walang sawang suporta ng MBHTE–TESD at RLSI–ZCLO sa pagbibigay ng dekalidad at inklusibong pagsasanay sa wika—isang mahalagang hakbang tungo sa mas maliwanag at progresibong kinabukasan para sa Bangsamoro. (Norhainie S. Saliao,BMN,BangsamoroToday)
