EU at BARMM, Nagpapatatag ng Suporta sa Agri-Enterprise sa 4th BAEP PSC Meeting
COTABATO CITY (Ika-3 ng Oktubre, 2025) — Pinangunahan ni Ministro Abunawas L. Maslamama ng Ministry of Agriculture, Fisheries, and Agrarian Reform (MAFAR) ang ika-apat na pagpupulong ng Project Steering Committee (PSC) ng European Union – Bangsamoro Agri-Enterprise Programme (EU-BAEP) sa lungsod ng Davao. Kabilang sa mga dumalo sina Dr. Marco Gemmer, Head of Cooperation ng EU Delegation sa Pilipinas, at ang BAEP Programme Manager na si Gng. Myrto Christofidou.
Sa kanyang pambungad na mensahe, mainit na tinanggap ni Minister Maslamama ang mga kalahok at ipinaabot ang taos-pusong pasasalamat sa European Union sa patuloy nitong suporta, pati na rin sa mga katuwang na organisasyon sa pagpapatupad ng programa: European Chamber of Commerce of the Philippines (ECCP), United Nations International Development Organization (UNIDO), People in Need (PIN), OXFAM, International Organization for Migration (IOM), United Nations Development Programme (UNDP), at ang BAEP Technical Assistance team.
“Ang pagpupulong natin ngayon ay higit pa sa pagsusuri ng ating mga nagawa; ito rin ay pagkakataong pag-aralan ang ating tinahak na landas, harapin ang mga hamon, at paigtingin pa ang ating mga estratehiya upang mas maging epektibo ang BAEP,” binigyang-diin ni Minister Maslamama.
Dagdag pa niya, ang BAEP ay hindi lamang isang karaniwang proyektong pangkaunlaran kundi bahagi ng mas malawak na layunin ng BARMM na isulong ang inklusibong pag-unlad, matatag na kabuhayan, at kapayapaan sa pamamagitan ng pagpapaigting ng kabuhayang pang-ekonomiya.
Nagbahagi rin ng ulat ang mga kinatawan mula sa implementing partners kaugnay sa mga tagumpay at pagsulong sa mga larangan ng: promotion ng pamumuhunan, Halal certification at food safety, pagsuporta sa kababaihan, pagpapalakas ng value chains, at mga modelo ng kabuhayan para sa mga baybaying komunidad.
Isa sa mga pangunahing kaganapan sa pagpupulong ay ang pormal na pag-apruba sa Bangsamoro Planning and Development Authority (BPDA) bilang miyembro ng PSC—isang hakbang na lalong nagpapatibay ng koordinasyon at pagkakahanay ng proyekto sa mga prayoridad ng BARMM para sa kaunlaran.
Pinag-usapan din ng mga kasapi ng PSC ang mga mekanismo para sa sustainability, mga target na layunin sa mga susunod na buwan, at mga estratehiyang magpapalawak pa ng pangmatagalang epekto ng programa. Natapos ang pagpupulong sa isang kolektibong pangako ng lahat ng kasangkot na ipagpatuloy ang pagtutulungan tungo sa isang mas inklusibo, matatag, at maunlad na Bangsamoro.
Ang EU-BAEP ay bahagi ng pangmatagalang suporta ng European Union upang makamit ang pangmatagalang kapayapaan at inklusibong kaunlaran sa Bangsamoro Autonomous Region in Muslim Mindanao (BARMM).
Layunin ng programa na suportahan ang maliliit at katamtamang laki ng mga prodyuser at negosyo sa agri-fishery value chains, partikular sa mga isla ng Basilan, Sulu, at Tawi-Tawi (BaSulTa), pati na rin ang sektor ng Halal at ang pagsulong ng pamumuhunan mula sa pribadong sektor sa buong rehiyon ng BARMM. (BMN/BangsamoroToday)
