MBHTE, Nagsagawa ng Pagbuo ng Contextualized Lesson Guides para sa Grades 2, 5, at 8
COTABATO CITY (Ika-7 ng Setyembre, 2025) — Matagumpay na naisagawa ng Ministry of Basic, Higher and Technical Education (MBHTE), sa pangunguna ng Curriculum and Learning Division (CLD) ng Directorate General for Basic Education, ang aktibidad na Development of Contextualized Lesson Guides gamit ang Bangsamoro Basic Education Curriculum Contextualization Framework para sa Grades 2, 5, at 8 (ikatlo at ikaapat na markahan), mula Agosto 29 hanggang Setyembre 5, sa Zamboanga City.
Pinamunuan ni Yul Adelfo Olaya, Chief ng CLD, ang naturang aktibidad na nilahukan ng mga guro-manunulat, illustrador, education program supervisors, at coordinators mula sa mga island divisions ng Basilan, Lamitan City, at Tawi-Tawi.
Bilang bahagi ng orientation at guideline-setting sessions, tinalakay ng mga tagapagsalita mula sa Unibersidad ng Pilipinas ang integrasyon ng Artificial Intelligence sa pagtuturo. Samantala, nagbahagi rin ng pananaw ang mga kinatawan mula sa Hayrat Foundation Malaysia hinggil sa paggamit ng faith-based approach sa edukasyon.
Ayon sa MBHTE, ang inisyatibong ito ay pagpapatuloy ng naunang aktibidad na isinagawa noong Hunyo 2025 sa Davao City, kung saan binuo naman ang mga lesson guides para sa unang at ikalawang markahan. Ang nasabing aktibidad ay nilahukan ng mga kalahok mula sa mainland divisions ng Cotabato City, Special Geographic Area (SGA), Maguindanao del Sur, Maguindanao del Norte, Lanao del Sur I, Lanao del Sur II, at Lungsod ng Marawi.
Sa pamamagitan ng mga kolaboratibong pagsisikap na ito, patuloy na pinapatunayan ng MBHTE ang matibay nitong paninindigan sa pagbibigay ng makabuluhan, kontekstuwalisado, at inklusibong mga kagamitang pampagkatuto para sa mga mag-aaral sa buong rehiyon ng Bangsamoro. (Tu Alid Alfonso, BMN/BangsamoroToday)
