Kawani ng MENRE Lumahoknsa Takbo Para sa Kalusugan, Hakbang Para sa Serbisyo
COTABATO CITY (Ika-7 ng Setyembre, 2025) — Labindalawang (12) kawani mula sa Ministry of Environment, Natural Resources, and Energy (MENRE) ang nakiisa sa “Ageless Moves: Wellness and Fun Run” ngayong ika-7 ng Setyembre sa Cotabato City Plaza, bilang bahagi ng pagdiriwang ng ika-125 Anibersaryo ng Philippine Civil Service.
Nakilahok ang mga kinatawan ng MENRE kasama ang daan-daang lingkod-bayan mula sa iba’t ibang ministeryo, ahensiya, at opisina ng Bangsamoro Autonomous Region in Muslim Mindanao (BARMM). Kabilang sa delegasyon ng MENRE sina Hasrafel A. Lauban, Najive Nava, Samsudin Robin R. Manakan, Datu Fahad A. Dalgan, Raff M. Abdilla, Zaidamin K. Dibaratun, Alibaser A. Datumanguda, Bairaiya Salipada, Abdul Basset M. Guiama, Norfahad Angkongat, Abdulnaseer Abdullatip, at Harris Samama.
Mula sa masiglang Zumba warm-up sa madaling araw hanggang sa sigawan ng suporta sa pagsisimula ng fun run, masiglang tumakbo ang mga kalahok sa 1km, 3km, at 5km na kategorya. Bitbit nila ang diwa ng tema ngayong taon ng PCSA: “Bawat Kawani, Lingkod Bayani: Puso, Dangal, at Galing Para sa Bayan.”
Higit pa sa isang aktibidad para sa kalusugan, layunin din ng pagtitipon ang makalikom ng pondo para sa Pamanang Lingkod Bayani (PLBi) program, na tumutulong sa mga pamilya ng mga yumaong lingkod-bayan na nasawi habang ginagampanan ang kanilang tungkulin.
Sa pagkakaroon ng 12 rehistradong kalahok, ipinamalas ng MENRE ang patuloy nitong suporta at pagkakaisa sa adhikaing magsilbi nang may puso, tibay, at malasakit para sa bayan. (BMN/BangsamoroToday)
