MILF-AHJAG Chair Alamada, Dumalo sa SPD-B Enhanced Curriculum Roll-out Workshop sa Davao City
COTABATO CITY (Ika-23 ng Agosto, 2025) — Dumalo at nagbigay ng lecture si Chairman Anwar S. Alamada ng MILF-Ad Hoc Joint Action Group (MILF-AHJAG) sa isinagawang Enhanced Curriculum Roll-out Workshop ng School of Peace and Democracy–Bangsamoro (SPD-B) sa lungsod ng Davao.
Binigyang-diin ni Chairman Alamada ang kahalagahan ng pagpapatatag ng organisasyon at ibinahagi rin niya ang kaniyang pananaw hinggil sa nagpapatuloy na proseso ng kapayapaan sa Bangsamoro. Kanyang pinuri ang mahalagang papel ng mga kasapi ng Moro Islamic Liberation Front (MILF) sa pagpapanatili ng kapayapaan at sa pag-ambag sa mas malawak na normalisasyon at transisyong demokratiko sa rehiyon.
Ayon sa Ad Hoc Joint Action Group FB post, dinaluhan ang aktibidad ng mga miyembro ng MILF mula sa iba’t ibang base fronts bilang bahagi ng patuloy na pagsisikap na palakasin ang kanilang kakayahan at hikayatin ang mas aktibong partisipasyon sa mga inisyatiba para sa kapayapaan at demokrasya.
Ang workshop ay pinangunahan ng Development Academy of Bangsamoro (DAB), katuwang ang United Nations Development Programme (UNDP), na layuning bigyan ng kaalaman at kasanayan ang mga miyembro ng MILF upang higit silang maging epektibong lider sibilyan at tagapagtaguyod ng kapayapaan sa kani-kanilang mga komunidad. (BMN/BangsamoroToday)
