Tawi-Tawi LGUs, Malugod na Tinanggap ang mga Panauhin kabilang si Education Secretary Angara

COTABATO CITY (Ika-30 ng Hunyo, 2025) — Pormal na tinanggap ng Pamahalaang Panlalawigan ng Tawi-Tawi, sa pamumuno ni Gobernador Yshmael “Mang” I. Sali, ang ilang national at international officials sa isang opisyal na pagbisita na ginanap noong Hunyo 25, 2025, sa Governor’s Lounge, Capitol Building, Bongao, Tawi-Tawi.

Ayon sa social emdu post ng lalawigan, ay kabilang sa mga panauhin sina Secretary Juan Edgardo “Sonny” Angara ng Department of Education, Philippine Army Commanding General Lt. Gen. Roy M. Galido, at ang mga ambassador ng India, Brunei, at Vietnam: Shri Kumar Jain, Megawati Manan, at Lai Thai Binh. Dumalo rin ang mga opisyal ng militar mula sa mga dayuhang embahada at iba pang kinatawan mula sa mga komunidad ng diplomatiko at depensa.

Sa kanyang pagbati, binigyang-diin ni Gobernador Sali ang tungkulin ng lalawigan bilang isang mapayapa at estratehikong lokasyon sa katimugang Pilipinas. Nagpahayag siya ng pasasalamat sa pagbisita at kinilala ang kahalagahan ng pakikipagtulungan sa pagkamit ng mga layunin sa pambansang kaunlaran. Bilang pasasalamat, ipinakita ng Gobernador ang mga plake ng pagkilala sa mga bumibisitang opisyal.

Sa pagpupulong, tinugunan ni Secretary Angara ang mga hamon na kinakaharap ng lokal na sektor ng edukasyon. “We wanted to personally check the schools,” sabi niya.

“There is still a strong need for more school buildings, teaching materials, and continued teacher training. Education is the backbone of national development, and we must invest in it especially in geographically isolated areas like Tawi-Tawi,” anya pa.

Malugod na tinanggap ni Gobernador Sali ang suportang ito at pinagtibay ang kahandaan ng Pamahalaang Panlalawigan na makipagtulungan sa Kagawaran ng Edukasyon sa mga imprastraktura ng paaralan at mga hakbangin sa pagpapaunlad ng mga guro.

Nagpahayag ng interes ang mga ambassadors sa pagbuo ng pakikipagtulungan sa Pamahalaang Panlalawigan ng Tawi-Tawi sa larangan ng turismo, kalakalan, at pamumuhunan. Ipinarating din nila ang kanilang layunin na palakasin ang ugnayan sa provincial at Bangsamoro regional governments.

Napag-usapan din sa pulong ang kapayapaan at seguridad. Muling pinatunayan ni Lt. Gen. Galido ang suporta ng Philippine Army sa pagpapanatili ng katatagan sa lalawigan, habang ipinarating naman ng mga dayuhang opisyal ng militar ang kahandaan ng kanilang pamahalaan na makibahagi sa mga inisyatiba sa humanitarian at peacebuilding sa Mindanao.

Ang mataas na antas na pakikipag-ugnayan na ito ay binibigyang-diin ang umuusbong na papel ng Tawi-Tawi sa pagtutulungan sa rehiyon at napapanatiling pag-unlad. Ang Pamahalaang Panlalawigan ay nananatiling nakatuon sa paghahangad ng inklusibong diyalogo, estratehikong pakikipagtulungan, at mga programang nagsusulong sa kapakanan ng mga mamamayan nito. (Tu Alid Alfonso, BMN/BangsamoroToday)