MDN, Sinimulan ang Malawakang Paglilinis ng Water Hyacinth sa Pamumuno ni Governor Mastura
COTABATO CITY (Ika-30 ng Mayo, 2025)— Sa pamumuno ni Governor Datu Sharifudin Tucao P. Mastura, CPA, inilunsad ng pamahalaang panlalawigan ng Maguindanao del Norte ang isang malawakang hakbang para labanan ang patuloy na pagdami ng water hyacinth sa mga ilog at kanal ng lalawigan.
Ang sobrang dami ng water hyacinth ay isa sa mga pangunahing sanhi ng pagbaha sa ilang lugar, na lubhang nakakaapekto sa kabuhayan ng mga residente at sa kalikasan.
Pinangungunahan nina Provincial Administrator Abdulrahim B. Piang at Provincial Disaster Risk Reduction Management Officer Datu Nashrullah A. Imam ang kampanyang ito. Katuwang nila ang mga lokal na pamahalaan, mga volunteer mula sa komunidad, at iba’t ibang ahensya para sa manwal na paglilinis sa mga lugar na matinding apektado gaya ng Mother Kabuntalan at Datu Odin Sinsuat.
Dahil limitado lamang ang kayang linisin gamit ang kamay, pinag-aaralan na rin ng pamahalaan ang pagbili ng makabagong kagamitan tulad ng aquatic weed harvester para mas mapabilis at mapadali ang pag-alis ng mga water hyacinth.
Layon ng hakbang na ito na magbigay ng pangkalahatang solusyon sa patuloy na pagdami ng halaman sa tubig.
Sa ilalim ng pamumuno ni Governor Mastura, nananatiling determinado ang lalawigan na magpatupad ng mabisang at pangmatagalang solusyon upang mapangalagaan ang mga daluyan ng tubig at maprotektahan ang mga komunidad sa Maguindanao del Norte. (Hasna U. Bacol, BMN/BangsamoroToday)
