Gobernador Mastura, Pinalalakas ang Suporta sa PWDs
COTABATO CITY (Ika-20 ng Mayo, 2025) — Isinagawa ng Pamahalaang Panlalawigan ng Maguindanao del Norte, sa pangunguna ni Gobernador Datu Sharifudin Tucao P. Mastura, CPA, ang kanilang kauna-unahang Pinagsamang Quarterly Meeting kasama ang mga Persons with Disabilities (PWDs) Municipal Focals at mga Opisyal ng PWD Federation noong ika-15 ng Mayo sa City Mall of Cotabato Activity Center.
Pinangunahan ito ng Provincial Disability Affairs Office (PDAO) at dinaluhan ng iba’t ibang mahalagang opisyal tulad ni Hadja Emma Salik-Ali, isang Social Worker mula sa Ministry of Social Services and Development (MSSD)-Maguindanao, at Monina K. Macarongon, ang Provincial Human Resource Management Officer ng lalawigan. Ipinakita ng kanilang presensya ang pagkakaisa ng mga ahensya ng pamahalaan sa pagtugon sa pangangailangan ng mga PWD.
Sa nasabing pulong, ibinahagi ng bawat kalahok ang kanilang mga karanasan, tagumpay, at mga hamon sa pagpapatupad ng mga programa para sa PWD. Sa huli, nagkaroon sila ng action planning kung saan inilatag ang mga susunod na hakbang upang mas maisulong pa ang pagiging inclusive o bukas para sa lahat ng mamamayan, lalo na sa sektor ng PWD.
Kasama rin sa pulong sina Ramil S. Mama, Presidente ng PDAO League, at Muhaymin P. Mama ng Provincial Planning and Development Office (PPDO), na parehong nagpahayag ng suporta sa pagbibigay halaga sa mga PWD sa mga plano at programa ng lalawigan.
Lumahok din ang iba pang kinatawan tulad ng mga Municipal Social Welfare Officers, PWD Focals, mga Opisyal ng Provincial at Municipal PWD Federation, at mga kinatawan mula sa Ministry of Interior and Local Government (MILG)-Maguindanao.
Ang pulong na ito ay isang mahalagang hakbang tungo sa patuloy na pagkilala at pagbibigay suporta sa mga karapatan at pangangailangan ng mga PWDs sa buong lalawigan. (Hasna U. Bacol, BMN/BangsamoroToday)
