MSSD Nagbigay ng Pasteurisadong Gatas sa 2,030 Bata sa LDS
COTABATO CITY (Ika-22 ng Marso, 2025) — Nagsagawa ng malawakang pamamahagi ng pasteurisadong gatas ang Ministry of Social Services and Development (MSSD) sa Lanao del Sur, bilang bahagi ng kanilang patuloy na inisyatibo upang mapabuti ang nutrisyon ng mga batang nasa edad dalawa (2) hanggang limang (5) taon. Ang pamamahagi ay nagsimula noong ika-6 ng Marso at nagpatuloy hanggang ika-20 ng Marso, na bahagi ng ika-14 na cycle ng Supplementary Feeding Program (SFP) ng ahensya.
Sa kabuuan, 56,025 pouches ng pasteurisadong gatas ang ipinamigay sa mga daycare learners na naka-enrol sa 93 Child Development Centers (CDCs) at 107 Supervised Neighborhood Play (SNP) centers sa buong lalawigan. Kabilang sa mga benepisyaryo ng programa ang 430 batang mula sa Marawi City, 270 mula sa Bubong, 277 mula sa Ditsaan-Ramain, 258 mula sa Masiu, 250 mula sa Poona Bayabao, 274 mula sa Tamparan, at 271 naman ay mula sa Taraka.
Ang SFP ay isang pambansang programa na pinangangasiwaan ng MSSD na naglalayong tiyakin na ang mga bata sa mga daycare centers at SNP centers ay makakatanggap ng sapat at masustansyang pagkain upang matulungan silang magkaroon ng malusog na katawan at maayos na paglaki.
Ayon sa MSSD, ang mga inisyatibong tulad nito ay mahalaga upang mapabuti ang nutrisyon at kalusugan ng mga kabataan, lalo na sa mga komunidad na may limitadong access sa mga pangunahing pagkain.
Sa pamamagitan ng mga ganitong programa, tinitiyak ng ahensya na ang mga batang nangangailangan ay may access sa pagkain na makakatulong sa kanilang cognitive at physical development. Ang pamamahagi ng pasteurisadong gatas ay isang konkretong hakbang upang matugunan ang mga nutrisyonal na pangangailangan ng mga kabataan sa Lanao del Sur. (USM BSIR OJT Student: Bai Onamayda P. Dilanggalen, BMN/BangsamoroToday)
