BARMM Health Minister Sinolinding, Jr. Tinanggap ang Chief Representative ng JICA Philippines

COTABATO CITY (Ika-22 ng Pebrero, 2025) — Malugod na tinanggap ni Health Minister Dr. Kadil “Jojo” M. Sinolinding, Jr. ang Chief Representative ng JICA Philippines Office, si Sakamoto Takema, kasama ang kanyang team, sa kanyang tanggapan sa MOH Compound, BGC, BARMM, Cotabato City.

Bilang kinatawan ng gobyerno sa ilalim ng pamumuno ni Chief Minister Ahod B. Ebrahim, ipinaabot ni Sinolinding ang kanyang pasasalamat sa JICA at kay Takema para sa patuloy na suporta sa Bangsamoro. Isang Plaque of Appreciation ang ibinigay kay Takema, pagpaparamdam ng pagpapahalaga sa kanyang mahalagang kontribusyon sa pagpapabuti ng kalusugan at nutrisyon ng mga mamamayang Bangsamoro. “For his invaluable contribution in promoting the health and nutrition of the Bangsamoro people – Arigato Gozaimasu!,” mensahe ng BARMM Health Minister.

Sa kanyang tugon, tiniyak ng papalitang Chief Representative ng JICA Philippines ang patuloy na suporta ng kanilang organisasyon. “You can count on us. We are always with you. JICA will stay here for the mothers and child health,” pahayag nito.

Kasama rin sa pagbisita ang talakayan tungkol sa mga proyektong may kaugnayan sa pagpapalakas ng serbisyo sa pangangalaga sa kalusugan ng mga ina at bata, gayundin ang pagpapabuti ng nutrisyon sa BARMM, at ang programa ng Knowledge Co-Creation. (Hasna U. Bacol, BMN/BangsamoroToday)