MILG, COMELEC, at Security Forces, Pinalakas ang Koordinasyon para sa Halalan 2025
COTABATO CITY (Ika-13 ng Pebrero, 2025) — Lumahok ang Ministry of the Interior and Local Government (MILG) sa Regional Coordinating Conference at sa ika-3 Regional Joint Security Control Center (RJSCC) meeting na pinangunahan ng Commission on Elections (COMELEC) – BARMM. Ginanap ang pagpupulong sa AL-Nor Hotel and Convention Center ito ay bilang paghahanda sa nalalapit na halalan sa banda kabilang ang kauna-unahang Parliamentary Elections sa Bangsamoro Autonomous Region in Muslim Mindanao.
Dumalo si MILG Minister Atty. Sha Elijah B. Dumama-Alba, Member of Parliament sa nasabing kumperensya upang pagtibayin ang dedikasyon ng ahensya sa maayos na koordinasyon at implementasyon ng mga electoral activities at hakbang pangseguridad. Bilang isa sa mga ahensyang naatasan ng COMELEC tuwing eleksyon, may mahalagang papel ang MILG sa pangangasiwa ng lokal na pamamahala, seguridad, at kaayusan sa rehiyon.
Sa pagpupulong, binigyang-diin ni Minister Dumama-Alba ang mahahalagang usapin kaugnay ng paghahanda sa halalan, kabilang ang koordinasyon sa pagitan ng mga lokal na pamahalaan (LGUs) at mga ahensyang nagpapatupad ng batas, estratehiya sa deployment ng seguridad, at pagtitiyak na maaabot ng publiko ang mga polling center sa buong rehiyon ng BARMM. Ipinaabot niya ang lubos na pagsuporta ng MILG sa pagsasagawa ng malaya, patas, at maayos na halalan.
Tiniyak din ni Minister Dumama-Alba na ang mga LGU ay ganap na susuporta sa mapayapang eleksyon. Binigyang-diin niya ang pagpapagana ng kinakailangang mekanismo sa mga lokal na antas upang agad matugunan ang mga isyung may kaugnayan sa halalan, habang sinisiguro ang pagsunod sa mga regulasyon ng COMELEC. Kabilang dito ang pagpapalakas ng ugnayan sa pagitan ng LGUs, pwersang panseguridad, at mga opisyal ng eleksyon upang maagap na tugunan ang anumang banta o insidente ng karahasang may kinalaman sa halalan.
Bukod dito, binigyang-halaga rin niya ang kahalagahan ng mga kampanya sa edukasyon ng mga botante upang mahikayat ang mas responsableng partisipasyon ng mamamayan. Sa pamamagitan ng paggamit ng lokal na mga mapagkukunan at pagpapatupad ng mga proaktibong hakbang, iginiit niya na may mahalagang papel ang LGUs sa pagpapanatili ng kaayusan, pangangalaga sa mga botante, at pagtataguyod ng isang demokratikong kapaligiran.
Pinangunahan naman ni COMELEC Regional Election Director at RJSCC Chairperson Atty. Ray F. Sumalipao ang mga talakayan, kung saan binigyang-diin niya ang kahalagahan ng sama-samang pagsisikap ng mga pangunahing stakeholder tulad ng Armed Forces of the Philippines (AFP), Philippine National Police (PNP), at iba pang ahensya ng pamahalaan. Ipinahayag niya ang kanyang pasasalamat sa patuloy na suporta ng MILG sa pangangalaga ng integridad ng halalan.
Muling pinagtibay ni Minister Dumama-Alba ang kahandaan ng MILG na makipagtulungan sa COMELEC at mga pwersang panseguridad, at sinabi niya, “The MILG remains steadfast in its commitment to facilitating a transparent and peaceful election. We will continue to engage with all stakeholders to address challenges and uphold democratic processes in the Bangsamoro region.”
Natapos ang kumperensya sa isang panawagan para sa mas pinaigting na koordinasyon ng mga ahensya, partikular sa seguridad ng mga polling area, pagbawas ng mga banta sa eleksyon, at pagpapalakas ng voter education initiatives. Habang papalapit ang Halalan 2025, patuloy na gaganap ng mahalagang papel ang MILG, COMELEC, at iba pang katuwang sa pagpapatibay ng isang kapani-paniwala at maayos na proseso ng eleksyon sa rehiyon ng Bangsamoro. (Hasna U. Bacol, BMN/BangsamoroToday)
