Kababaihang Bangsamoro, Nangunguna sa Pagtataguyod ng Kapayapaan sa BARMM
COTABATO CITY (Ika-30 ng Oktubre, 2024)— Nagsimula ang International Conference on Women, Peace, and Security (ICWPS) noong Lunes, ika-28 ng Oktubre, habang ginugunita ang ika-25 anibersaryo ng United Nations Security Council Resolution (UNSCR) 1325.
Layunin ng UNSCR 1325 na palakasin ang partisipasyon ng kababaihan sa pag-iwas sa mga sigalot, usapang pangkapayapaan, peacebuilding, humanitarian response, post-conflict reconstruction, at ang pagtatanggol ng kanilang mga karapatang pantao sa panahon ng kaguluhan at sakuna.
Ang tema ng komperensya ngayong taon ay “Forging Collaboration and Convergence for Advancing Women, Peace, and Security,” ay naglalayong pagtipunin ang pamahalaan, civil society, akademya, at iba pang mahalagang sektor upang talakayin ang mga hamon at tagumpay sa pagpapalawak ng papel ng kababaihan sa pagsulong ng pangmatagalang kapayapaan at pag-unlad.
Sa ikalawang araw ng komperensya, nanguna ang Ministry of the Interior and Local Government ng Bangsamoro Autonomous Region in Muslim Mindanao (MILG-BARMM) na kinatawan ni Minister at Member of Parliament Atty. Sha Elijah B. Dumama-Alba. Ang sesyon na pinamagatang “Women Advancing at the Crossroads: Sustaining the Gains of Peace and Progress in Bangsamoro Autonomous Region in Muslim Mindanao” ay dinaluhan ng mga kilalang lider mula sa rehiyon tulad nina Atty. Laisa Masuhud-Alamia (Deputy Speaker ng Bangsamoro Transition Authority), Bainon G. Karon (Chairperson ng Bangsamoro Women Commission), at Diamila Disimban-Ramos (Chairperson ng Committee on Women, Youth, Children, and Persons with Disability sa Bangsamoro Transition Authority).
Idinaos sa Philippine International Convention Center, ang komperensya ay bahagi ng pandaigdigang paggunita sa ika-25 anibersaryo ng UNSCR 1325 sa Women, Peace, and Security. Ang temang “Forging Collaboration and Convergence for Advancing Women, Peace, and Security” ay nagtipon ng mga pamahalaan, civil society, at mga pandaigdigang organisasyon upang suriin ang progreso ng Women, Peace, and Security (WPS) agenda.
Sa bahagi ng reaction segment, nagbigay ng mahahalagang pananaw si Minister Dumama-Alba, na binigyang-diin ang pangangailangan na palakasin ang access ng kababaihan sa hustisya at pangalagaan ang kanilang mga karapatan sa loob ng balangkas ng kapayapaan at seguridad. Aniya, “Women in the Bangsamoro are not just beneficiaries of peace but key drivers in ensuring its sustainability.”
Hinimok ni Dumama-Alba ang pagpapasok ng mga gender-sensitive policies sa sistema ng hustisya at binigyang-diin ang kahalagahan ng pagpapalakas sa kababaihan bilang mga pangunahing tauhan sa pagpapalaganap ng pangmatagalang kapayapaan at inklusibidad. Ipinakita niya ang mahalagang papel na ginagampanan ng kababaihang Bangsamoro sa proseso ng kapayapaan at ang patuloy nilang ambag sa pamamahala at pag-unlad.
Tinatalakay din ng sesyon ang promosyon ng aktibong partisipasyon ng kababaihan sa bawat yugto ng peacebuilding, kabilang ang pag-iwas sa sakuna at pagtugon sa mga ito, at gender mainstreaming sa mga hakbang sa climate change.
Ang pakikilahok ng MILG-BARMM, sa pamumuno ni Dumama-Alba, ay nagbigay-diin sa pangako ng rehiyon sa pagpapatibay ng kababaihan bilang mga ahente ng pagbabago. Ito ay naaayon sa hangarin ni BARMM Chief Minister Ahod B. Ebrahim, na palaging tumatangkilik sa pagsasama ng kababaihan sa mahahalagang inisyatibo sa pamahalaan at kapayapaan bilang bahagi ng Enhanced 12-Point Agenda.
Ang ICWPS, na tatagal hanggang ika-30 ng Oktubre, ay patuloy na magiging mahalagang plataporma para sa pagpapalakas ng papel ng kababaihan sa peace and security sa buong mundo. Ang aktibong pakikilahok ng mga lider ng Bangsamoro ay nagpapatibay sa partisipasyon ng rehiyon sa pandaigdigang WPS agenda na naglalayong mapanatili ang sigla ng mga inisyatibang pangkapayapaan na pinamumunuan ng kababaihan. (Hasna U. Bacol, BMN/BangsamoroToday)
