1,350 Pamilyang Apektado ng Baha sa Mamasapano, MDS, Tumanggap ng Tulong
COTABATO CITY (Ika-5 ng Oktubre, 2024) — Umabot sa kabuuang 1,350 pamilyang naapektuhan ng baha sa bayan ng Mamasapano, Maguindanao del Sur ang nakatanggap ng tulong mula sa Ministry of Social Services and Development (MSSD) noong ika-4 ng Oktubre.
Ang bawat pamilya ay binigyan ng mga pangunahing pangangailangan tulad ng 25 kilo ng bigas, iba’t ibang de-latang pagkain, at instant na kape upang makatugon sa kanilang pangangailangan.
Ayon sa MSSD, ang social intervention na ito ay bahagi ng Emergency Relief Assistance Program ng Disaster Response Management Division ng MSSD.
Ang pamamahagi ng tulong ay isinagawa ng mga field workers mula sa MSSD Municipal Social Welfare Office ng Mamasapano, kasama ang Municipal Links, parasocial workers, staff ng Municipal Disaster Risk Reduction and Management, at mga opisyal ng Barangay Local Government Unit. (Hasna U. Bacol, BMN/BangsamoroToday)
