BARMM Lipaladu din kanu 2025 Automated Elections – COMELEC
COTABATO CITY (Ika-6 kanu September, 2024) — Su Commission on Elections (COMELEC) na tinantu nin sa lipaladu din su Bangsamoro Autonomous Region in Muslim Mindanao (BARMM) kanu kapigkawma na automated elections sa 2025 sya kanu inged’u Bangsamoro.
Nyaba i inipayag ni Atty. Rafael Olaño, Deputy Executive Director for Operations nu Commission on Elections (COMELEC) sa lipaladu din kun su automated counting machines (ACMs) indu dala kasiling a mabproblema lun apya pan madala su kurinti.
Su ACMs na nyaba i mausal kanu paganay a parliamentary elections sa BARMM a pakadsalngan nin su national indu local a elections sa May 2025. Sya kanu ulan-ulan na December 2024, na nya kadakil a pakawma ACMs na 110,000.
Su ACMs na kagaga nin kun pidtugitok su mga boto nu timindu indu balalagoy sa 84 ka oras i kawgit na kagaga na batirya nin apya maadin i brownout. Adin kun bun i nya assistive devices para kanu mga sadil, mana uni ganat sa headphones sya kanu adin diperensya na kabamakikinig nin.
Pinanginggat nu COMELEC su media indu Civil Society Organizations sa ilangkap nilan su kapamandu, kapangagi sa ukita kapidtindu nu mga botante. Nalabit bun na COMELEC i adin dwatiman a imbalangan na balota sa BARMM, ika-isa na para sa national election indu regional election.
Samaya na su Bangsamoro Information Office (BIO) nu BARMM na nangunan sa kapapidzabot kanu madakil a taw kanu programa nilan a Halalang Bangsamoro, sya kanu kinadtabanga nu COMELEC indu imbalang’ balang a CSOs, asal ka matantu sa su mga botante na lipaladu sa 2025 parliamentary elections. (Tu Alid Alfonso, BMN/BangsamoroToday)
