Caravan ng Teknolohiya ng MOST, Dinala sa Tawi-Tawi
COTABATO CITY (Ika-2 ng Setyembre, 2024) — Nagsagawa ang Ministry of Science and Technology (MOST) ng Bangsamoro Government ng Fora Caravan sa tinatayang 62 miyembro ng Micro, Small, at Medium Enterprises (MSMEs) na pinagtatrabahuhan ng Technology Application and Promotion Section (TAPS) sa lalawigan ng Tawi-Tawi noong ika-29 hanggang ika-28 ng Agosto.
Naglalayong bigyan ng akses ang mga interesadong mga lokal na negosyo sa rehiyon sa makabagong teknolohiya at mga mapagkukunan ng inobasyon. Sa pamamagitan ng caravan, nabigyan ng pagkakataon ang mga kalahok na tuklasin ang iba’t ibang kagamitang teknolohikal, kagamitan, at mga serbisyong maaaring makabuti sa kanilang operasyon at pataasin ang kanilang kakayahang makipagkompetensya sa merkado.
Nakatuon ang Technology Fora Caravan sa pagbibigay ng pagsasanay para sa mga MSMEs, para sa kaligtasan ng pagkain, halal practices, at mga teknolohiya sa pagproseso ng seaweed. Binigyan ng kaalaman at kasanayan ang mga partisipante upang maunawaan ang aplikasyon ng teknolohiya sa kanilang partikular na pangangailangan sa negosyo.
Ayon sa MOST, binibigyang-diin din ng inisyatibong ito ang kahalagahan ng pagsunod sa mga alituntunin na itinakda ng Food and Drug Administration upang masiguro na ang mga produktong pagkain ay may mataas na kalidad at ligtas kainin.
Nagbigay ng kaalaman sina Bea Hannah Midtimbang-Unggui at Samera Gumandel tungkol sa mga Konsepto ng Kaligtasan sa Pagkain, Konsepto at Prinsipyo ng Halal. Direktang sinagot nila ang mga tanong ng mga kalahok sa kanilang mga sesyon. Naging daan din ang forum sa masiglang talakayan tungkol sa iba’t ibang aspeto ng food safety at halal practices.
Sumunod na nagbigay ng karagdagang mga aral at demonstrasyon si Assistant Professor Meri Lyn Amlani mula sa MSU-Tawi-Tawi College of Technology and Oceanography, College of Fisheries, na nakatuon sa mga teknolohiya ng pagproseso ng seaweed. Ipinakita niya ang iba’t ibang uri ng seaweed at ang potensyal ng mga ito sa pagbuo ng iba’t ibang by-products. Kabilang dito ang Seaweed Chips at Pickled Seaweeds na maaaring gawin mula sa pagproseso ng seaweed.
Natuto ang mga kalahok ng tamang mga sangkap at proseso sa paggawa ng mga produktong ito, at nagbahagi ng kanilang mga opinyon at suhestiyon para sa mga paksang maaaring talakayin sa hinaharap na makakatulong pa sa kanilang negosyo at produksyon.
Sa huli, ipinakilala ni Bea Hannah Midtimbang ang iba’t ibang mga programang tulong na inaalok ng ministry upang mapabuti ang kabuhayan sa Tawi-Tawi. Ipinaliwanag niya ang mga proseso, mga kinakailangan, at mga pangunahing sektor na maaaring makinabang sa mga programang ito. (Hasna U. Bacol, BMN/BangsamoroToday)
